ភ្នំពេញ៖ ដូចឆ្នាំមុនៗដែរ អភិបាលខេត្តមួយចំនួនបានប្រកាសផ្តល់អំណោយលើកទឹកចិត្តដល់បេក្ខជនដែលទទួលបាននិទ្ទេស A នៅឆ្នាំនេះ។ អំណោយទាំងនោះរួមមាន កុំព្យូទ័រ ថវិកាមួយចំនួន អាហារូបករណ៍ និងរង្វាន់ផ្សេងៗទៀតផងដែរ។

អភិបាលខេត្តកោះកុង លោកស្រី មិថុនា ភូថង បានប្រាប់ឱ្យដឹងនៅក្នុងផេកផ្លូវការរបស់លោកស្រីនៅថ្ងៃទី០៥ ខែធ្នូ ឆ្នាំ២០២២ថា អភិបាលខេត្តនឹងផ្តល់កុំព្យូទ័រយួរដៃ ១គ្រឿង ថវិកាចំនួន៤លានរៀល ព្រមទាំងអាហារូបករណ៍ពីសកលវិទ្យាល័យផ្សេងទៀតដល់បេក្ខជនដែលប្រឡងបាក់ឌុបបាននិទ្ទេស A នៅឆ្នាំ២០២២នេះ។

ជាមួយគ្នានេះ ក្នុងផេកផ្លូវការរបស់អភិបាលខេត្តកំពង់ស្ពឺ លោក វ៉ី សំណាង ក៏បានប្រកាសផ្តល់រង្វាន់លើកទឹកចិត្តដល់សិស្សនិទ្ទេស A ផងដែរ ដើម្បីតបស្នងនឹងការខិតខំប្រឹងប្រែងរបស់សិស្សានុសិស្ស។ ចំពោះរង្វាន់ លោកអភិបាលខេត្តមិនទាន់បញ្ជាក់ឱ្យដឹងនៅឡើយទេ។

លោកប្រាប់ដូច្នេះថា៖ «រង្វាន់នៅតែមានសម្រាប់សិស្សនិទ្ទេស A ។ ចំពោះវត្ថុសម្រាប់លើកទឹកចិត្តនិទ្ទេស A សុំលាក់សិន»។

គូសរំលឹកថា កន្លងមក លោកតែងតែផ្តល់ម៉ូតូម្នាក់មួយគ្រឿងដល់សិស្សជាប់និទ្ទេស A។ នៅក្នុងខេត្តកំពង់ស្ពឺមានបេក្ខជនប្រឡងបាក់ឌុបឆ្នាំនេះចំនួន ៤៦២៨នាក់ និងស្រី ២៥០២នាក់ប្រឡងនៅក្នុងមណ្ឌលប្រឡងចំនួន១១ មានបន្ទប់ចំនួន ១៨៧។

ចំណែកអភិបាលខេត្តកណ្តាលវិញ ក៏នៅតែប្រកាសផ្តល់រង្វាន់លើកទឹកចិត្តដល់សិស្សានុសិស្សដែលប្រឡងជាប់និទ្ទេស A ផងដែរ ខណៈការប្រឡងឆ្នាំនេះមានបេក្ខជនចុះឈ្មោះប្រឡងចំនួន ១០,៤០១នាក់ ក្នុងនោះស្រី ៥,៧៤៦នាក់ ប្រឡងនៅ ១៩មណ្ឌល ស្មើនឹង ៤១៩បន្ទប់។

រង្វាន់ដែលខាងអភិបាលខេត្តកណ្តាលតែងតែផ្តល់ជូនសិស្សនិទ្ទេស A គឺដូចនឹងអភិបាលខេត្តមួយចំនួនផ្តល់ឱ្យផងដែរ នោះគឺជាម៉ូតូ និងរង្វាន់លើកទឹកចិត្តផ្សេងៗទៀត។

គូសរំលឹកថា ការប្រឡងបាក់ឌុបឆ្នាំ២០២១ កន្លងមកមានបេក្ខជនប្រឡងជាប់ចំនួន ៧២ ០១៦នាក់ ក្នុងនោះជាប់និទ្ទេស A ចំនួន ១៧៥៣នាក់ និទ្ទេស B ចំនួន ៥ ២១៥នាក់ និទ្ទេស C ចំនួន ១១ ៦៣៤នាក់ និទ្ទេស D ចំនួន ២៣ ៤៩៩នាក់ និងនិទ្ទេស E ចំនួន ២៩ ៩១៥នាក់។

តួលេខសិស្សនិទ្ទេស A ឆ្នាំមុន គឺមានការកើនឡើងបើធៀបនឹងឆ្នាំ២០១៩ ដែលមានចំនួន ៤៤៣នាក់ដែលជាប់និទ្ទេស A និទ្ទេស B ចំនួន ២ ៤៣០នាក់ និទ្ទេស C ចំនួន ៥ ៨៤៧នាក់ និទ្ទេស D ចំនួន ១៤ ១០០នាក់ និងនិទ្ទេស E ចំនួន ៥៦ ២៣២នាក់៕